केही क्षण हराउँदैमा 

 म तिम्रा आँखाहरूलाई 

 मेरो दृष्टि मान्न सक्दिनँ

 केही क्षण रमाउँदैमा 

 म तिम्रो साथलाई

मेरो संसार मान्न सक्दिनँ 

 

 खुशी को हुँदैन 

 जीवनमा कसैको साथ पाउँदा  

 तर मेरो खुशी तिम्रै वरिपरि मात्र घुम्छ

 म मान्न सक्दिनँ 

 

 संसार धेरै ठूलो छ

  भिन्न तिमी अनि धेरै भिन्न म

  रमाउँला नी कहिले काहिँ

  हाम्रा भिन्न भिन्न रहरहरूमा

   तर तिम्रो रहरलाई मेरो

   जिउँने आधार मान्न सक्दिनँ

 

 धेरै छन् बदल्नु पर्ने कुरा संसारमा

  आफैलाई पनि त बदल्नु छ

  तर तिम्रा निमित्त भनेर म 

  आफैलाई तिमी बनाउन सक्दिनँ

 

 भावना त हो

 चरा जस्तै हुन्छ 

 उडेर गयो भने पनि कसैलाई त कैद 

 अवश्य बनाउँछ 

 सम्झनाहरूले खोलेको पिंजरामा म

 आफैंलाई कैद गर्न सक्दिनँ

 

तिमी सबै संजोग हो भन्छौ

 संजोगले मजबूत बनिदैन सम्बन्ध

 न त भावनाले नै बनिन्छ

 विचारले बनिन्छ सम्बन्ध बलियो 

 तर मात्र तिम्रो विचार 

 म आफ्नो मान्न सक्दिनँ 

 

 समय संगै

 बद्लिरहेको छ प्रेमको परिभाषा

 प्रेम आफै कैद बनिरहेको छ 

 जात, धर्म र  सम्पत्तिको पिंजरामा 

 मेरो कर्तव्य तिम्रो खुशी बनाइएको छ

 अनि मेरो खुशी तिम्रो सम्पत्ति

 म तिमीलाई हेरि मेरो शरीर तिमीलाई 

 सुम्पिन सक्दिन 

 

 गोल्डडिगरको

 ठूलो ताज लगाइएको छ मेरो सिरमा

 म तिमी जसरी नै जन्मिए 

 हाम्रो पहिलो रूवाई पनि त एउटै थियो 

तर पितृसत्ताले बनाइएको भगवान तिमी

 म दास होइन तिम्रो

 म तिमीलाई जीवन साथी स्वीकार्न सक्छु

भगवान होइन..!